அரக்கோணம் ரயில்வே போலீசார் திருடனை கைது செய்தனர்
அரக்கோணம் ரயில்வே போலீசார் நேற்று ரயில்வே நிலையத்தில் ரோந்து பணியில் ஈடுபட்டிருந்தனர். அப்போது 2வது பிளாட்பாரத்தில் உள்ள பயணிகள் காத்திருப்பு அறையின் அருகே சந்தேகப்படும் வகையில் நின்று கொண்டிருந்த வாலிபர் போலீசார் வருவதை கண்டு அங்கிருந்து தப்பி ஓடினார். போலீசார் விரட்டி சென்று மடக்கி பிடித்து அரக்கோணம் ரயில்வே போலீஸ் நிலையத்திற்கு அழைத்து சென்று விசாரணை செய்தனர்.
விசாரணையில், அந்த வாலிபர் அரக்கோணம் அடுத்த ஆத்தூர் கிராமத்தை சேர்ந்த நாகமுத்து என்பவரின் மகன் மாரியப்பன் (42) என்பதும், ரயில் பயணிகளிடம் திருட்டு சம்பவங்களில் ஈடுபட்டு சென்னை, காட்பாடி, ஜோலார்பேட்டை ஆகிய ரயில்வே போலீஸ் நிலையங்களில் வழக்குகள் இருப்பதும் மேலும், அரக்கோணம் டவுன் போலீஸ் நிலையத்தில் வழிப்பறியில் ஈடுபட்ட வழக்குகள் நிலுவையில் இருப்பதும் தெரியவந்தது.
இதனையடுத்து ரயில்வே போலீசார் வழக்கு பதிவு செய்து கைது செய்து சிறையில் அடைத்தனர்.
இந்த சம்பவம் அரக்கோணம் பகுதியில் பெரும் அதிர்ச்சியை ஏற்படுத்தியுள்ளது. ரயில் பயணிகள் தங்கள் பொருட்களை பாதுகாப்பாக வைத்திருக்க வேண்டும் என்று போலீசார் அறிவுறுத்தியுள்ளனர்.
