ராணிப்பேட்டை அருகே உறவினர் மகள் நிச்சயத்தார்த்தத்திற்கு சென்ற போது மணல் லாரி மோதி விவசாயி பலியானார்.
வாலாஜாபேட்டை அடுத்த மருதாலம் கூட் ரோடு கஸ்தூரி கிராமத்தை சேர்ந்தவர் ஏழுமலை(35) விவசாயி. இவர் தனது உறவினர் மகள் நிச்சயத்தார்த்த நிகழ்ச்சிக்கு பங்கேற்க ராணிப்பேட்டை அடுத்த அக்ராவரம் கிராமத்திலுள்ள திருமண மண்டபத்திற்கு இருசக்கர வாகனத்தில் தனது உறவினர்களான செந்தில், ராமச்சந்திரன் ஆகியோருடன் சென்றுள்ளார்.
அப்போது அக்ராவரத்தில் சாலையை கடக்க முயன்ற போது எதிர்பாராத விதமாக எதிரே மணல் ஏற்றி வந்த லாரி இருசக்கர வாகனத்தின் மிது மோதி விபத்துக்குள்ளானது.
இதில், தூக்கி எறியப்பட்ட ஏழுமலை சம்பவ இடத்திலேயே பரிதாபமாக உயிரிழந்தார். செந்தில், ராமச்சந்திரன் ஆகியோர் பலத்த காயங்களுடன் வாலாஜா அரசு மருத்துவமனையில் சிகிச்சைக்காக அனுமதிக்கப்பட்டு சிகிச்சை பெற்று வருகின்றனர். மேலும், இச்சம்பவம் குறித்து சிப்காட் போலீசார் வழக்கு பதிவு செய்து விசாரணை மேற்கொண்டு வருகின்றனர்.
மேலும், தப்பியோடிய மணல் லாரி டிரைவரை போலீசார் வலைவீசி தேடி வருகின்றனர்.
