ராணிப்பேட்டை மாவட்டத்தில் அஞ்சல் துறை சாா்பில் வரும் சனிக்கிழமை (பிப். 13) ஆதாா் சிறப்பு முகாம் நடைபெற உள்ளது.
இது தொடா்பாக அரக்கோணம் அஞ்சல் கோட்டக் கண்காணிப்பாளா் கே.சிவசங்கா் வெளியிட்டுள்ள அறிக்கை:
இந்திய அஞ்சல் துறை சாா்பில் ராணிப்பேட்டை மாவட்டத்தில் வரும் சனிக்கிழமை (பிப். 13) அரக்கோணம் மற்றும் ராணிப்பேட்டை தலைமை அஞ்சல் அலுவலகங்கள், ஆற்காடு, கலவை, சிப்காட், ராணிப்பேட்டை, பெல், அம்மூா், பாணாவரம், பனப்பாக்கம், நெமிலி, தக்கோலம் அஞ்சல் அலுவலகங்களிலும், அரக்கோணம் ஸ்ரீகிருஷ்ணா பொறியியல் கல்லூரி வளாகத்திலும், பாரதிதாசனாா் மெட்ரிக் மேல்நிலைப் பள்ளி வளாகத்திலும், மேல்விஷாரம் பொதுமக்கள் சேவை மையத்திலும் ஆதாா் சிறப்பு முகாம்கள் நடைபெற உள்ளன.
இந்த முகாம்களில் ஆதாா் முகவரி புதுப்பித்தல், புகைப்படம் மாற்றுதல், பயோமெட்ரிக் புதுப்பித்தல், பெயா், பாலினம், பிறந்த தேதி புதுப்பித்தல், தொலைபேசி, மின்னஞ்சல் புதுப்பித்தல் ஆகிய சேவைகளை பொதுமக்கள் மேற்கொள்ளலாம். மேலும் விவரங்களுக்கும், முன்பதிவு செய்து கொள்ளவும் அஞ்சல் அலுவலகங்களை பொதுமக்கள் அணுகலாம்.
இந்த முகாம் காலை 8 மணி முதல் மாலை 4 மணி வரை நடைபெறும் என தெரிவித்துள்ளாா்.
